مساء الخير على جميع اعضاء المنتدى بادئ ذي بدء (من زمان ودي اقول هالكلمة) اهنئكم جميعا بمناسبة دخول شهر رمضان الكريم "وكل عام وانتم بخير" ... والله يعيينا واياكم على صيامه وقيامه . استودعكم جميعا يا احلى اعضاء ويا احلى منتدى ... قضيت معكم احلى اوقاتي ... استفدت منكم واتمنى اني قدمت بالمقابل شي يفيدكم ... ودي استمر معاكم لكن للاسف "مجلس الوزراء" ما عطانا عطلة مثل الناس ... لازم ينكدون علينا حياتنا .. "اسبوعين ما راح تضركم يا مجلس الوزراء" ... حنا مستعدين نتنازل عن ثلاث اسابيع من عطلة الصيف القادمة ما عندنا خلاف .... لكن ما نقدر نقول الا الله المستعان ...والله يخلف على اعضاء مجلس الامة .. كل شي يطالبون فيه ما تسويه الحكومة .. اسقاط قروض وعطوهم طاف.. زيادة خمسين وطاف ثاني ... ابقاء الدوواين وهدموها فوق روسهم ... عطلة رمضان و طاااااااااااااف .. شنو فايدتهم تكفون؟ ... ما احب السياسة المحلية ولا ادانيها ... احسها عقيمة ما فيها "خذ وهات"... كل شي يوصل لطريق مسدود ... وكله تشاؤم ومستقبل اسود ... (لحظة.. انا شطيت عن الموضوع من القهر) ... اللي ابي اقوله اني راح انقطع عن المنتدى طوال العام الدراسي القادم ... يعني يمديكم تنسوني ... وودي ازوركم بين كل فترة وفترة -ولا اوعدكم بالشي هذا- لان ابي "لبى معاليق قلبه" راح يستولي على لابتوبي من بكرة وطوال فترة دراستي ... يبيني اجيب معدل عالي لان اخر سنة عليها (60%) من المعدل التراكمي حسب النظام الجديد "الموحد"... وابشركم ان معدلي التراكمي حتى الان ممتاز وابغي اكمل جميلي واتخرج بمعدل طيب يأهلني للحصول على بعثة دراسية لامريكا (هندسة ان شاء الله) ... ولا تنسونا بدعواتكم بالتوفيق والنجاح ... واتمنى انكم ما تنسوني وتذكروني بالخير في فترة غيابي (اتعبّر وببكي.. طرت على بالي اخر لقطة من فيلم شمس الزناتي). يالله ما تشوفون شر ... ومع السلامة
__________________